أشهر المحققين الخياليين 4/6
علي النقيض من السيد الراقي "شيرلوك هولمز" و الجنتلمان "بوارو".. و الآنسة الرقيقة "مس ماربل".. بيقعد الكاتب و المخرج "ويليام لينك William Link " إلي مكتبه سنة 1968، و يرسم الخطوط الأولى لشخصية "كولومبو Columbo"...
ملازم الشرطة الغير مهندم.. بمعطفه الكاكي، و ربطة عنقه اللي مش مربوطة كويس.. و ذيل الكرافت اللي ورا أطول من طرفها الأمامي.. و ياقة القميص كل واحدة مخاصمة التانية.. و السيجار في إيده...
بتشوف "كولومبو" و هو بينزل من عربيته الخربة.. اللي لوحتها المعدنية متدلية بمسمار واحد.. و بتمشي بصعوبة.. بس فيها راديو بيستقبل "موجات الشرطة police scanner".. و بتقول إن دا لا يمكن يكون له أي علاقة بالبحث الجنائي.. خصوصا لما تشوف كلبه الكسول "فانج Fang".. اللي هو مابيعملش اي حاجة من اللي بتعملها كلاب المخبرين و الشرطة.. و لا بيتتبع مجرمين و لا له اي فايدة فعلياً غير إنه رفيق "كولومبو"...
"كولومبو" مع ذلك مع هيئته "الملخفنة" دي.. بيمتلك ذكاء حاد للغاية.. و قال للمجرم مرة في قصة "قضية وداع الجريمة ذات الذكاء الخارق" :
"طيلة عمري كنت أتعثر في الأذكياء.. ليس الاذكياء الذين يشبهونك.. لا.. أنت تعرف ما أعنيه.. في المدرسة.. في الحياة.. كان الجميع اذكى مني.. لكنني فهمت إنني بالقراءة و العمل الجاد.. أستطيع ان أتفوق..."..
"كولومبو" عنده ذاكرة فولاذية.. مبتخليهوش ينسى أي تفاصيل. بالإضافة إلي إنه بالرغم من هيئته - و على عكس كلبه - شديد النشاط.. فائق الحيوية.. طول الوقت بيتحرك و يلف و يزور أماكن و يتردد على مسرح الجريمة.. و ممكن تشوفه في آخر مكان ممكن تتوقعه في آخر وقت ممكن تتوقعه...
"كولومبو" بيعتمد في حل لغز الجرائم بالإضافة لصفاته اللي قلناها.. إلي إنه بيربك المشتبه فيه و يشتت انتباهه و يوتره.. بالتالي بيخليه يغلط..
يعني ممكن "كولومبو" يكون بيكلمك كمشتبه فيه.. و يسالك سؤال.. و فجأة قبلما تجاوب يسيبك بلا سابق انذار و يدخل الحمام..! صحيح حيطلع من الحمام بطلونه و البالطو غرقانين مياه.. و يمكن يكون ناسي البنطلون نفسه مفتوح.. بس دي من طرقه اللي بيستعملها في إرباك خصومه...
"كولومبو" بيربك المشتبه فيه بطريقة أخرى.. دايما بعد ما يظهرلك إنه اقتنع بكلامك و بالكلام اللي بتألفه.. و يقوم يمشي و انت تتنفس الصعداء في ارتياح.. تلاقيه رجع نط لك فجأة و بيقولك جملته الشهيرة و هو بيهرش جبهته: "معلش.. في حاجة كمان just one more thing".. و يرميلك كلمة أو جملة تبين إن كلامك متناقض.. و يبتسم لك ابتسامة مستفزة.. و يسيبك متوتر.. و يمشي...
"كولومبو" مهذب للغاية.. و عنده موهبة إنه يحسس المجرم أجيانا إنه فلت بجريمته و إنه مش بيشك فيه.. فدا يدفعه للخطأ و السقوط...
"كولومبو" محدش كان يعرف اسمه بالكامل.. لكن في قضية "الحمولة الساكنة Dead Weight".. نقدر نوقف لقطة في الحلقة و "كولمبو" بيبرز هويته في الميناء.. و بنلاقي مكتوب فيها "الملازم/ فرانك كولومبو Frank Columbo" - شرطة لوس أنجيليس...
"كولومبو" كشرطي.. زمايله و مديريه عارفين قدراته كويس.. بينما مكتب المدعي العام أول مرة شافوه ماقتنعش بيه لما حول له رئيسه أول قضية له.. وفضل مكتب المدعى العام يضغط على الشرطة عشان تغيره...
فيما بعد.. بقى لما تيجي قضية مخيفة أو صعبة للغاية أو معقدة.. مكتب المدعي العام بيضغط بعنف علي الشرطة عشان تحولها إلي "كولومبو"...!
بيستعين "كولومبو" بخبراته الهائلة اللي اخدها من الجيش.. لأنه حارب مع الجيش الأمريكي في الحرب الكورية.. قبلما ينهي خدمته و ينضم لجهاز الشرطة و يستلمه "الرقيب جيلولي Gilhooley" ,و بيكون له بمثابة معلم و أب.. و بيعمله كتير جدا جدا عن شغل الشرطة و عن طرق الإيقاع بالمجرمين.. عشان كده دايما "كولومبو" مش ناسي الجميل و دايما يذكر الرقيب دا في قصصه...
علي كل حال "كولومبو" بيعشق عمله كشرطي في قسم "جرائم القتل homicide department".. مرة في خصم قاتل ذو نفوذ.. حاول يستبعد "كولومبو" من الإدارة بنفوذه و اتصالاته في "قضية Prescription Murder" بس بيكتشف إنه بيفضل خايف من "كولومبو" اللي بيفضل يطارده في إصرار.. لحد ما بيوقع بيه في النهاية...
عكس قصص "شيرلوك هولمز" و "بوارو" و "مس ماربل".. اللي بتفضل الجريمة فيهم لغز صعب و خفي علي القاريء لحد ما يحلها المحقق.. قصص كولومبو من نوع "قصص المحققين المعكوسة Inverted detective story" المعروفة باسم "كيف قبض عليهم howcatchem".. في أول القصة انت بتشوف الجريمة والمجرم و تعرف القاتل و تعرف أنه ارتكب جريمته .. و إزاي بيخفي الأدلة بمهارة.. و بعدين تتفرج على "كولومبو" و هو بيجمع تفاصيل بسيطة و يحاصر المجرم و يوقع به بعبقرية..
أحيانا مابتعرفش القاتل ارتكب جريمته إزاي.. زي في قضية "حالة ذهنية قاتلة A deadly state of mind".. اللي بتشوف فيه الضحية بتلقى بنفسها بإرادتها بدون تهديد و لا عنف و لا اي سبب.. من الطابق الخامس و تنزل جثة هامدة.. لكن كولومبو بيتوصل لأن القاتل خدرها و سلبها الإرادة بمخدر الـ"باربيورات Barbiturate" و اقنعها إنها بتقفز في حوض سباحة..
في قصة رائعة هي "صديق بالفعل A friend indeed" مفوض من مفوضي الحكومة الأمريكي بيقتل زوجته.. بإنه بيغرقها في حوض سباحة.. و بيخفي مجوهراتها و بيتهم أحد عماله.. شخص بريء.. بقتلها....
"كولومبو" بيحاول يثبت الجريمة على مفوض الدولة "رجل الأدلة و القانون البارع".. بس مابيعرفش.. لحد ما بيتقبض علي البريء.. و بياخدوه مع رجال الشرطة و "كولومبو" إلي منزل الرجل المدون عنوانه في بياناته في الشرطة.. و أثناء التفتيش.. المفوض" بيطلع من جيبه منديل فيه قطع من مجوهرات زوجته و بيحشره تحت مرتبة سرير الرجل.. بدون ما حد يشوفه...
"كولومبو" بيصارح المفوض إنه بيعتقد إن هو القاتل و هو اللي قتل زوجته.. و "المفوض" بيقول له إنه كده خسر شارته و انتهى مستقبله كشرطي.. أثناء النقاش و أمام الجميع.. بيجي أحد رجال الشرطة بمنديل المجوهرات.. و بيقول إنه لقاه تحت المرتبة.. و بيقهقه المفوض ساخرا من "كولومبو" و بيقول له.. إن دا دليل لا يضحد على إن المتهم هو القاتل.. و بيعلن "المفوض" أمام الجميع.. إنه كان مراقب البيت دا من شهور و شاف المتهم متوتر مرتبك بعد الجريمة و هو راجع و وهو مروح كل يوم عدة مرات و راقبه و هو بيبيع قطع من الجواهر نازل بيها من بيته..
لكن "كولومبو" بيتهمه بإنه زرع المجوهرات دي دلوقتي حالاً.. و لما بيثور المفتش.. "كولومبو" بيعلن له في هدوء.. إن دا "بيته"...!
الداهية "كولومبو" بدّل عناوين المنازل على الملفات في إدارة البحث الجنائي.. و بالتالي المنزل اللي هم واقفين فيه حالا كان منزل "كولومبو" نفسه..!! و بالتالي كل كلام المفوض عن مراقبة البيت من شهور.. و المجوهرات تحت المرتبة.. مالوش اي معنى إلا أن يكون هو القاتل و بيحاول الإيقاع ببريء...
أما في قضية "كيف ترتكب جريمة هاتفية How to dial a murder".. فالطبيب النفسي الوقور "فيليب ميسون Dr. Eric Mason" ..كان عايش وحيد بعد مقتل زوجته في حادث سيارة غامض.. وكان بيمتلك كلبين دوبرمان شرسين.. بينقضوا في يوم على صديق عمره "د. تشارلز هنتر Dr. Charles Hunter" اللي كان متعود يزوره و يقيم معاه في المنزل بعد وفاة زوحته.. و بلا سابق إنذار بيهاجموه في مطبخ البيت بلا مبرر و بيمزقوه إربا حتى الموت...
بيتقبض علي الكلبين و بيتم اتخاذ اجراءات لإعدامهم بمعرفة جهاز الشرطة.. بس "كولومبو" بيرفض.. و بيحتفظ بالكلاب لفترة و بيقول إنه "اعاد تدريبها" و بيرجعها لصاحبها..
كولومبو متأكد إن د. إريك هو القاتل.. و بيزوره في يوم.. و يلعب معاه بلياردو في منزله و بيتهمه بإنه قتل زوجته و صديق عمره لأنه اكتشف خيانتهم له مع بعض.. و إنه برمج الكلاب على إنه لما تسمع كلمة بريئة معينة تتحول لآلات قتل.. و بالطريقة دي قتل صديقه اللي سمع رسالته على الأنسر ماشين في المطبخ و الكلبين بجواره.. و استقبلوا الأمر و.. و مزقوه...
"كولومبو" بيصارح القاتل إنه مش محقق ذكي.. بالعكس.. هو اللي كان قاتل حمار و ساب وراه ثغرات كتير.. فالقاتل بيقول له إنه يستحق إنه يعرف الكلمة اللي بتخلي الكلاب تتحول لآلات قتل.. و هي "برعم الوردة Rosebud" و بيقولها و هو بيشاور للكلبين علي كولومبو..
و دا يعني إنه الكلاب حاتنقض علي "كولومبو" و تمزقه حتى الموت..
بالفعل الكلاب بتقوم من جنب المدفأة بسرعة مدهشة و ينقضوا علي "كولومبو" و يسقطوه ارضا.. و يندفعوا نحو وجهه و عنقه.. و بعدين يبدأوا في لعق وجهه و غمره بالقبلات امام د. "ميسن" المذهول.. و "كولومبو" بيعلن للقاتل إنه شغل شريط الأنسر ماشين كلمة كلمة على مسامع الكلبين في حجز الشرطة.. و عرف الكلمة السحرية من بدري.. و أعاد تدريبهم.. بحيث لما يسمعوها.. يغمروا الضحية بالقبلات....!..
أجمل من جسد شخصية "فرانك كولومبو" كان "بيتر فولك Peter Falk" اللي في الصور دا.. اتوفي في 23 يونيو 2011...
بما إن "ويليام لينك" أساساً مخرج.. فالشخصية مبتظهرش في كتاب.. لا.. بيتلقفها التليفزيون الأمريكي على طول في مسلسل بنفس الاسم.. قبل ما تنزل في كتب.. آخر حلقة منه كانت "القسط الأخير The last installment" في 2003.. "كولومبو" مماتش في الحلقة الأخيرة.. بس توقف الكتّاب عنه.. و انصرفت شركة يونيفرسال عن انتاج حلقاته...
في تمثال في ميدان لحد النهاردة لـ"فرانك كولومبو" زي ما جسده "بيتر فولك" و كلبه اللطيف الكسول "فانج" في "بودابست Budapest" بالمجر...
الكلام عن كولومبو ممكن يستغرق أسابيع.. بس أعتقد إنه آن الأوان إننا نتكلم عن المحققة الذكية "مدام فلتشر Jessica Beatrice Fletcher".. و يكون للحديث بقية...
<script data-cfasync='false' type='text/javascript' src='//p442829.clksite.com/adServe/banners?tid=442829_867372_0'></script>
تعليقات
إرسال تعليق