أشهر المحققين الخياليين 6/6

طبيب أعزب عجوز، ساخر ملول عصبي، نحيل.. يدخن بشراهة كقاطرة بخارية..

أحب فتاة واحدة في حياته كلها، التقاها أثناء دراسته للدكتوراه بالجامعة.. و لم يتزوجها قط.. المفروض إنه لم يتزوج أبدا.. لكن في قصة من قصصه بيعلن لنا إنه تزوج بالفعل مرة...

كل قصصه تدور حول عالم ماوراء الطبيعة و الباراسيكولوجي.. ذلك العالم المجهول المليء بالأساطير.. مع مسحة من علم النفس...

يعتبر نفسه "هادم أساطير".. لأنه بيبحث في عالم الأساطير في قصصه باسلوب عقلاني محايد.. و بالتالي بيرفض الإقتناع بالخوارق اللي بتصطدم بالعلم و المنطق بفجاجة في بداياته.. بس للأسف مع الوقت بتتغير قناعاته دي.. و يكتشف إن في حاجات عجز عن حلها بالعلم و المنطق..

صعب نصنفه في رأيي مع "هولمز" و "بوارو" و "مس ماربل" و "ميجريه" و "فلتشر" و "كولومبو" كمحقق.. لكن هو متصنف وسطهم بالفعل من قبل جمعيات أدبية محترمة و نقاد كتير...

شخصية النهاردة هي الدكتور "ميسر علي Misir Ali" من الأدب البنغالي.. و مؤلفه "هوميان أحمد Humayun Ahmed".. اللي رسم خطوط شخصيته سنة 1972.. و شافت النور سنة 1975...

الدكتور "ميسر" عايش وحيد.. و له جيران مزعجين.. بعضهم غريب الأطوار.. و بيستعين بخادم لتسيير شئون بيته.. اللي هو شقة صغيرة.. و دايما الخادم يسرقه و يختفي.. و يجيب غيره فيسرقه و يختفي.. و هكذا...

"ميسر علي" طبيب نفسي.. و حبيبته الوحيدة ماتجوزهاش أبدا.. و إن كان في قصة من قصصه أعلن انه تزوجها.. مؤلفه بيقول إن دا خطأ منه.. المفترض إنه ماتجوزهاش خالص.. و عايش على حبها للأبد.. لحد ما يفني الكون و تحترق النجوم...

مدخن شره جدا.. بيولع "سيجارة تلو الأخرى Chain smoker".. و دا خلاه مصحة أمراض متنقلة.. و صحته مش ولابد.. "ميسر علي" نموذج لـ"نقيض البطل the anti-hero".. كما يجب أن يكون...

الدكتور "ميسر" بحكم عمله بيقابل غرائب لا تنتهي.. من ناس بتملك قوى فائقة للحواس و بتقرا الأفكار و تحرك عن بعد.. لناس بتقرا أوراق الكوتشينة و تقولك المستقبل في قصة " ورقة القلوب Hearts-Spades " لناس بتمشي و هي نايمة و ترتكب جرائم.. لطفل ممسوس.. و غيره و غيره...

بيواجه مجموعة مخاوف لعدة أشخاص في "حلقة الخوف The Ring of fear".. اللي صدرت بالاسم التجاري "خوف ভয় - Fear"...

له مصطلحات في قصصه بيألفها قارئه زي "إينوخ The Eunuch".. كتاب السحر القديم في قصة "The Eunuch - বৃহন্নলা".. و بيقابل شياطين و عفاريت و له تيمات مرعبة في قصصه.. و بيكتب مصطلحات أخرى زي "السائر ليلا The Night Roamer" ..

كمان بيكتب قصة بيلتقي فيها نفسه و يطرح شخصيته للقاريء.. اسمها "أنا ميسر علي I am Misir Ali" ...

في أساطير و ألغاز ماعرفش يحلها بالمنطق و عجز العلم عن إيجاد تفسير لها.. فجمعها و سماها "ميسر على: ألغاز لم يتم حلها Misir Ali: Unsolved"....

تقدر تحمّل قصص "ميسر علي" من جوجل و تترجمها على جوجل كذلك.. صحيح مش حتطلع ترجمة لطيفة.. بس حتفهم الحوار و الجو العام للموضوع.. بيموت "د. "ميسر علي" في 2012.. و بتتوقف قصصه..

قصص "ميسر علي" متعمقة في عالم ماوراء الطبيعة وعلم النفس.. و لها شق يتعلق بالجانب المظلم من النفس البشرية و الغوص في أعماق النفوس المعقدة المجنونة.. و الحقيقة أنا بشوف إنها ساذجة نوعاً.. و لا تقارن مثلا بقصص المفتش "زكي".. المصري.. لا من حيث الحبكة و لا البنيان...

و المفتش "زكي".. من بنات أفكار "د. نبيل فاروق".. و ظهر في التسعينيات في سلسلة "بانوراما" كقصص قصيرة علي حلقات غير متصلة...

مفتش مباحث ذكي لماح.. زي هولمز.. بيلاحظ أدق التفاصيل.. لماح زي "كولومبو".. و قوي البنية و بيشتبك مع المجرم أحيانا زي "ماجنوم" في قتال يدوي مباشر.. كما إنه بارع في إطلاق النار زي "ميجريه"..

المفتش "زكي" صموت جدا.. و دي صفة عند "مس ماربل".. بعدما اتطورت شخصيتها.. وبتمتلكها أحيانا "مسز فلتشر".. يقعد يراقب في صمت.. و لما تتجه الشكوك إلي بريء و يكاد يطبق عليه الأمر من كل جانب.. يتكلم "زكي" و يعلن الحقيقة...

"زكي" بيستعمل طريقة "هولمز" و بيردد جملته الشهيرة: "إذا استبعدنا المستحيلات.. بقيت لنا الحقيقة مهما بلغت غرابتها".. و هو مابيخفيش إعجابه بـ"هولمز" و بينسب له العبارة دي لما بيرددها في قصصه...

و طريقته هي نفس طريقة هولمز: "الإستبعاد المنطقي Abductive reasoning".. للأسف د. نبيل توقف عن كتابة قصص المفتش "زكي".. لأن القصص اللي من النوع دا بتاخد مجهود عقلي خارق.. و هو حالته الصحية مكانتش تسمح بدا...

طبعا دا ما يخليناش ننسى قصص أخرى زي دي من اللي نعرفها كلنا و اتربينا عليها.. زي "المغامرون الخمسة".. للأستاذ محمود سالم..

قليلين جدا عارفين إن الأستاذ "محمود سالم" كتب القصص دي عن طفولته هو.. كان طفل ذكي.. بدين وحيد منعزل مالوش أصدقاء.. فرسم في خياله عالم رائع.. يكون له فيه اصدقاء و يتعاونوا معاه في حل الجرائم..

"تختخ" هو الأستاذ العظيم "محمود سالم" نفسه.. لكن في طفولته.. و كان قال مرة عن نفسه "أعتقد أن المغامرين الخمسة هي نوع من استعادة شجون وذكريات طفل متوحد ومنعزل"...

الأستاذ "محمود سالم" بيقول لنا إنه اقتبس فكرة سلسلة "المغامرون الخمسة".. من سلسلة الكاتبة الإنجليزية "إينيد بلايتون Enid Blyton".. "كاشفو الالغاز الخمسة و كلبهم The Five Find-Outers and Dog".. اللي بدأ بأنه ترجم أول خمس أعداد منها.. واشار لمصدر الإقتباس.. و على كل حال.. السلسة مفيهاش تشابه إلا في الفكرة العامة: "خمس أطفال و كلبهم بيحلوا الجرائم".. القصة اللي كانت في مخليته و حس إنها بتداعب ذكريات طفولته...

و كان الأستاذ "محمود سالم" الله يرحمه أول من قدم النوع دا من الأدب للصغار في العالم العربي...

الإقتباس شيء حميد و مسموح بيه في عالم الأدب و الفن والكتابة بشكل عام.. سواء أدبية أو علمية.. بشرط إنك تعلن دا و تشير لمصدرك الأصلي.. و إلا تبقي حرامي.. زي "عمو" اللي من كام يوم كان بيقولك "ماقريتش رواية الكاتب الإنجليزي" و هو قراها عنده جوه...

في سلاسل كتير لمحققين سريين صغار.. بيحلوا الجرائم.. زي المغامرون الخمسة و مغامرات ع × 2 و الشياطين الـ13.. و المحقق كونان.. و "ليوك هاردينج Luke Harding" و "السبعة السريين The Secret Seven" و "إينولا هولمز Enola Holmes".. و غيرهم كتير جدا.. و لا يتسع المجال للحديث عنهم المرة دي.. و محتاجين نبقي نعمل لهم سلسلة لوحدهم قريباً بإذن الله...

إحنا حتى ماعرضناش كل المحققين الكبار من عينة "هولمز" و "فلتشر".. بس اتكلمنا عن أشهرهم و أكثرهم تأثيراً...

و عامة النوع دا من الأدب بيكون له تأثير قوي جدا على القاريء.. و بيقدح زناد فكره و يقوي ملكة التفكير المنطقي العقلاني.. و دا من الأسباب الهامة.. اللي خلتهم يوجهوا الأدب دا بالذات للأطفال في دول كتير...

يمكن معظم كتاب النوع دا اللي ذكرناهم رحلوا عن عالمنا أو توقفوا عن الكتابة.. لكن أبطالهم
"هولمز" و "بوارو" و "ماربل" و "فلتشر" و "ميجريه" و "زكي" و "كولومبو" و "كوين" و ماجنوم".. و "ميسر علي" و"تختخ" و "كونان" و غيرهم كتير.. لسه موجودين...

<script data-cfasync='false' type='text/javascript' src='//p442829.clksite.com/adServe/banners?tid=442829_867372_0'></script>