أشهر المحققين الخياليين 1/6

احنا اتربينا على القصص دي و علمتنا كتير في سبل التفكير المنطقي العقلاني.. بس النهاردة للأسف توارت في الظل، و محدش بقى يعرف عنها شيء...

العام 1841.. و الجريمة الغريبة في "شارع مورج".. اللي بتروح ضحيتها "مدام ليسبانيه Madame L'Espanaye" و بنتها داخل منزلهم..

جريمة بشعة محدش عارف يتوصل سرها..

بيظهر السيد "أوجوست ديووبا Auguste Dupin".. هو مش محقق محترف.. بس ذكي للغاية، و له مصطلح ظهر لأول مرة و دخل اللغة على إيده و نقدر نترجمه بالـ"تفكير المنطقي ratiocination" مع شوية خيال خلّاق...

"The Murders in the Rue Morgue الجرائم في شارع مورج" ..

أول رواية على الإطلاق في العصر الحديث بيظهر فيها شخصية "المحقق" اللي بيوصل لحل لغز الجريمة عندما يعجز الجميع.. و يظهر ""أوجوست ديووبا" كأول شخصية خيالية لمحقق في الأدب الحديث.. علي يد الأديب الأمريكي العظيم "إدجار ألآن بوو Edgar Allan Poe"...

بيظهر بعد كده "أوجوست ديووبا" مرتين في قصص "بوو".. مرة في قصة "لغز ماري روجيه The Mystery of Marie Rogêt" و مرة أخيرة في قصة "الرسالة المسروقة The Purloined Letter".. و بعدين بينزوي و يختفي، مع وفاة "بوو" نفسه، بالرغم من إنه بيظل يحمل لقب "أول محقق في عالم الأدب" لحد يومنا هذا.. و بيصبح مصدر إلهام للكثيرين من بعده...

مشكلة "أوجوست ديووبا" كمحقق.. إنه فيه شيء غير بشري.. تحس إنه آلة للمنطق و بس.. بخلاف شخصية المحقق البريطاني "شيرلوك هولمز Sherlock Holmes" اللي ظهرت بعده سنة 1887...

و"هولمز" بالمناسبة استوحاه مؤلفه "آرثر كونان دويل Sir Arthur Conan Doyle" اللي في الصورة دا.. من شخصية حقيقة..

شخصية موجودة في عالم الواقع.. امتلكت الذكاء و قوة الملاحظة الخارقين دول بالفعل..

الشخصية دي كانت البروفسير الإسكتلندي "جوزيف بل Joseph Bell" أستاذ الجراحة بجامعة إدنبرة، اللي كان بيمتلك قوة ملاحظة تفوق الخيال، بتمكنه من الوصول لاستنتاجات كبري، بناء علي ملاحظات بسيطة، بيجمعها سويا بطريقة منطقية...

الدكتور "جوزيف بل" كان يقدر يعرف مشاكلك الصحية من النظر في وجهك.. و يقدر يعرف أصلك و أسلافك من ملامحك و تكوينك العظمي.. و يقدر يعرف الحوداث اللي اتعرضت لها من الخدوش علي جلدك و يعرف إنك في مشكلة بتؤرقك من الحلقات الداكنة حول عينيك بسبب السهر.. و ينظر إلي اصابعك فيشوف أثر "لخاتم" مخلوع.. فيعرف إنها مشكلة عاطفية!

بالإضافة لبروفسيور "بل".. "هولمز" بيحمل كتير جدا من صفات "سير هنري دونكان ليتلجون Sir Henry Duncan Littlejohn" أستاذ الطب الشرعي، اللي بحكم عمله، علّم "دويل" حاجات كتير في مجال الجريمة، و خلاه يقف علي الحد الفاصل بين الطب و بين نظام العدالة...

"هولمز" بيعتمد على قوة ملاحظته الخرافية، و طريقة "الإستبعاد المنطقي Abductive reasoning".. بيستبعد كل المستحيلات و يدرس الباقي بالمنطق.. و يجمع التفاصيل الصغيرة و يوصل للحقيقة.. و له دايما جملة بيقولها "إذا استبعدنا المستحيلات، بقيت لنا الحقيقة مهما بلغت غرابتها"...

هولمز ملاكم بارع زي ما بنكتشف في قصة "علامة الأربعة The Sign of the Four".. و خبير في فنون القتال زي ما بيصرح في قصة "مغامرة المنزل الخالي The Adventure of the Empty House".. و بارع في التصويب و استخدام الأسلحة النارية.. و عامة قوة "هولمز" الجسدية مش طبيعية.. و بتتفوق بمراحل على الرجل العادي...

هولمز معاه دايما صديقة الطبيب "واطسون Dr. Watson" اللي بيمثل له "الغباء البشري المعتاد" في حل لغز الجريمة.. و بالتالي لما واطسون بيفكر في إتجاه معين.. هولمز بيستبعد الإتجاه دا.. لأن دي الطريقة اللي القاتل عايز "الناس العادية" زي "واطسون" تفكر بيها...

"هولمز" بدأ فقير، لدرجة إنه اتعرف علي واطسون لما كان بيدور على حد يسكن معاه و يقتسم معاه الإيجار.. و بعدين بدأ يكسب كتير جدا من عمله.. بس واطسون بيشير في "مغامرة بيتر بلاك The Adventure of Black Peter" إن "هولمز" كان بيرفض يقدم خدماته أحيانا حتى للأثرياء و ذوي النفوذ مهما أغروه بالمال، لو القضية لم تثر اهتمامه أو تستهويه ...

بخلاف "واطسون" اللي كان متزوج و ترمّل.. "هولمز" عدو للمرأة.. و يبدو إنه مالوش تقل علي قصص "ما انت لو مهتم كنت عرفت لوحدك".. و "انت بطلت تحبني زي زمان و الشغل خدك مني".. لأنه بيقول في مرة "إزاي ارتبط بكائن غامض مش مفهوم زي المرأة؟.. إزاي تقدر تبني بناء ثابت على رمال متحركة"..؟

و بيتكلم "دويل" عن هولمز في رسالة للدكتور "جوزيف بل" و بيقول له "ممكن هولمز يقع في الحب لو الكمبيوتر وقع في الحب".. مشيرا لأول جهاز بدائي نقدر نسميه "كمبيوتر".. اخترعه "تشارلز بابادج Charles Babbage" سنة 1837...

بس اللي بيحصل مع الوقت.. إن الناس بتتعامل مع "سير كونان دويل" عشان "هولمز" بس.. و لما بيدعى لحفل بيبقي بسبب "هولمز" وبيبقي أي حوار معاه عن "هولمز".. و لما حد بيبعت له هدية بيبقى علشان "هولمز".. و لما بتعجب بيه سيدة بيكون اعجابا بشخصية "هولمز"..

كل حياته بقت مبنية علي "هولمز".. و دا بيبدأ يسبب له ضيق.. و نوع خاص جدا من الغيرة.. من الشخصية اللي ابتكرها بنفسه...

و في ليلة باردة من ليالي ديسمبر سنة 1893 بيقعد "دويل" إلي مكتبه و بيكتب قصة "اللغز الأخير The Final Problem".. اللي بيقرر ينهي فيها حياة بطله "شيرلوك هولمز" للأبد...

في القصة دي "دويل" بيقدم مجرم محترف "خارق الذكاء criminal mastermind" يليق بـ"هولمز".. "الدكتور جيمس مورياتي James Moriarty"، أستاذ الرياضيات العبقري، اللي انحرف و سلك عالم الجريمة، و اتورط في عشرات من جرائم السرقة و التزوير و القتل، دون ما يسيب وراه دليل واحد.. يخلي الشرطة تقدر تقبض عليه...

"هولمز" بيحاول يتتبع "مورياتي".. فالأخ "مورياتي" بيروح له البيت و بيطلب منه يتوقف عن مطاردته و إلا حيضطر يقتله.. "هولمز" بيرفض.. و بيتعرض لثلاث حوادث مميتة كلها من تدبير المجرم العبقري .. و بينجو منها بأعجوبة..

بيسافر "هولمز" بعدها لسويسرا و بيترك رسالة لواطسون.. "هولمز" كان رايح يلتقي بالمجرم العبقري د. "مورياتي" عند شلالات رايكنباك Reichenbach Falls " عشان يتناقشوا ويدخلوا في مبارزة عقلية.. و يصارح كل منهم الآخر إزاي كان بيتوصل لتحركات التاني و يقتفي اثره...

صراع بين عقل.. و عقل...

لما بيروح "واطسون" لمكان اللقاء.. مبيلاقيش حد.. بس لما بيقرا الرسالة بيكتشف إن "هولمز" قرر يخلص المجتمع من شرور "مورياتي" بس "بمقابل فادح سيحزن كل المقربين منه"..

بيعرف واطسون إن صراع دار بين الرجلين انتهت سطوره بموت المحقق و المجرم معاً و غرقهم في الشلال.. و محدش عرف ينتشل جثثهم...

بيموت "هولمز".. و بيستقبل القراء القصة دي بذهول وباستنكار..

و انهالت علي "دويل" الخطابات الغاضبة المعترضة.. بس "دويل" كان استريح و حس انه استرد شخصيته اللي طغى عليها "هولمز"...

للأسف بيفاجأ "دويل" إن الناس بدأت تنفض من حواليه تدريجياً و محدش بقي بيكلمه أساساً.. و لا حد بيزوره و لا يسأل عنه زي زمان.. و لقى نفسه وحيد تماما.. فاضطر يرجع "هولمز" للحياة مرة أخرى في قصة "كلب عائلة باسكرفيل The Hound of the Baskervilles ".. و بيشرح "هولمز" لواطسون في القصة إن موته كان مجرد تمثيلية عشان يتخلص من أعدائه...

في كتير مايعرفوش "سير آرثر كونان دويل" بس مفيش حد في العالم من أقصاه إلي أقصاه ماسمعش عن "شيرلوك هولمز".. لدرجة إنه تسلل للإفيهات و الأمثال الشعبية في العالم كله كرمز للذكاء و التفكير المنطقي..

"هولمز" له تمثال لحد النهاردة في مسقط رأس "دويل" بأدنبره.. التمثال اللي في الصورة دا..

طريقة "هولمز" في الإستنتاج و الوصول للقاتل عامله زي السحر حقيقي.. و في خبراء كتير شايفة إنه أثّر في تطوير علوم الطب الشرعي نفسها و كيفية تعاملها مع مسرح الجريمة و في علم "الإجرام Criminology"..

لحد النهاردة.. طريقة "هولمز" في الإستنتاج بيتم تدريسها للطلبة في كليات الشرطة في معظم دول العالم...

هولمز يختلف عن "هركيول بوارو Hercule Poirot" المحقق البلجيكي شديد البراعة.. اللي ابتكرته "أجاثا كريستي Dame Agatha Christie".. اللي طبعا يحتاج منشور لوحده، و دا يخلي لحديثنا بقية...

<script data-cfasync='false' type='text/javascript' src='//p442829.clksite.com/adServe/banners?tid=442829_867372_0'></script>